Plantun de Prouvènço

Pèr coumpara dos planto d'encò nostre

Hieracium leiopogon & Abies alba

Hieracium leiopogon

Asteraceae Compositae

Nom en français : Épervière leiopogon.

Descripcioun :
Aquesto esparello trachis dins li mountagno de Prouvènço preaupenco. Fai partido dóu group HIERACIUM que se recounèis à si cambo que porton qu'uno souleto fueio. Li fueio basalo soun verdalo, en lanço, cuberto de long péu, e mai ou mens tacado. L'enflourejado èi paurineto emé un à dous capitule (brout en pinceloun). Li bratèio soun cuberto de péu estela emé quàuqui péu glandoulous negre e d'autre simple blanc e frisa (fotò).

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 10 à 50 cm
Fueio : basalo
Tipe bioulougico : Emicriptoufite
Cicle bioulougico : Planto renadivo

Gènre : Hieracium
Famiho : Asteraceae
Famiho classico : Compositae
Tribu : Cichorieae
Ordre : Asterales

Coulour de la flour : Jauno
Petalo : >6
Ø (o loungour) flour : 2 à 3 cm
Flourido : Printèms - Estiéu

Sòu : Ca
Autour basso e auto : 300 à 2200 m
Aparado : Noun
Mai à juliet

Liò : Tepiero roucaiouso - Esboudèu
Estànci : Subremediterran à Subaupen
Couroulougi : Ouroufito-Sud-Ouèst-Aupenco
Ref. sc. : Hieracium leiopogon Gren., 1872

Sapin

Abies alba

Pinaceae

Àutri noum : Sap, Sapino, Abet, Sapi.

Noms en français : Sapin pectiné, Sapin blanc.

Descripcioun :
Pèr pas s'engana emé la serento fau regarda coume soun lis aguio o peréu li pigno (o vacheto). Li fueio dóu sapin soun tóuti dins lou meme plan coume un penche, au contro de li de la serento que soun estacado tout à l'entour de la ramo coume uno brosso. De nouta pamens qu'acò marcho pas pèr d'ùni sap fourestié (coume Abies pinsapo). Li pigno, quouro li poudès vèire, se tènon bèn drecho, alor qu'encò de la serento pendoulon.

Usanço :
La pegoulo (bijoun) dóu sapin èi di proun vulneràri. Ero acampado emé de boutihoun coupa en biais e tanca dins li bosso de la rusclo (O. Madon). S'emplegavo en emplastro sus lis estorso (P. Lieutaghi) o dins li tisano contro lou toussi.